Hapon nin pagkaniaki

Bago pa dagos na magtapos an aldaw, nahiling kong maogmang nagkakarawat an sakuyang mga kaakian sa malinig na natad kan eskwelahan.

Makamumuya sindang pagtan-awon mantang minadalagan nin maliksi, minakurag-it habang minalakay sa bolang piggagapo kan mga kakawat sa may mag-ibong. Salamat ta harani na magpahuway an aldaw. Dae na ining ragitnit na itinatao asin kun may natatada pa mang init, magayon ini sa pamati.

Binuot kong lumuwas hale sa sakong klasrum, binutsan an pulang ballpen dangan an binayaan an mga papel na kasubag-o pa nagpapamurusot sa sako. “Dae na naman nakasabot an mga aki ko..” sabi ko sa sadiri mantang nagbabasa kan mga simbag sa hapot na itinao ko makalihis an klase. Igua man ki nakanuod alagad nagkapira sana.

Parehong mga aki an nasa luwas na nagkakarawat dangan so mga aki na nagtao sako kan saindang mga papel kasubagô. Sa boot ko, marhay pa sa pagkarawat ta mga aktibo an haros gabos sainda.

Duminulok ako sa kung sain irituon sinda maogmang nagpapalipas kan aldaw o tibaad pa naghahali kan stress sa maghapong kakaadal. Nasa mga mata ninda an dae masukol na ogma. Kun may nakamurusot man sinda itong atab ma-out sa kawat o laen kaya gigabatan kan lawas kaya mas dakol an pahuway kaysa dalagan nan paglikay.

Ginumos na papel na napapatos nin plastik an saindang nagsirbeng bola, minalikay ini sa tuyong iguon urog na kun minahayop an paros. Naisip ko, tibaad so mga papel ini na naguing kawsa kan saindang pagkauyam matapos makakua nin hababang iskor sa quiz.

Siring sa saro sa sainda, siring sa sarong aki, nakiugma ako sa paglikay sa bola mantang minalayog sa paros. Paborito ako kan bolang ito. Siguro habang nasa tahaw ako asin an ibang mga kaapin sa kawat, habang minapalayog idtong mga tagagapo, naiisip ninda, “ngonian makabalos na ako!” Dangan pa an bola minahadok sako.

Sa kadaklan na beses ako an enot na natatangko sa kawat alagad nabu-‘buhay’ man tulos kan mga matitibay na kaapin. May beses man, ako an titada. Istratehiya daa tanganing atab kaming magtungalan nin puwesto, kami naman an magapo ta sinda an sa tahaw – an samong iiguon… Sa boot ko, tatao man palan magdiskarte an mga aki na ini. Iinoton so mga matitibay nan an mga maluya itatada.

Habang kami an taya, an tagagapo, maingat na minalikay sindang mga nasa tahaw sa bola. Siring baga ito sa hapot na itinatao ko habang may klase sinda, kun daeng aram o habo ninda minaduko na sana. Sa diit na tiyaga nan tamang butas kan bola, minasain baya na dae sinda matama.

Sa pagtatapos kan kawat mantang nagkakarigos sa daplos nan nagbubukod kan hinangos, maogma akong maguing aki sa guiraray kaiba sinda. Pierde, alagad may ugma nahiling ko kun panô sinda nagkaigwa nin diskarte tanganing manggana o maghinguha na makaigo kaya o makasalo kan bola… Sa masunod na aldaw, sa klasrum naman kami makawat… Sisiguraduhon ko gabos na kami gana.

3 thoughts on “Hapon nin pagkaniaki”

      1. na rurumduman q ang samong pag karwat asin ngbuburulagting sa eskwelahan sir.. diit pa aq jan mabuta sa tripad pero mala hanggang nag graduate kmi cge me jan k garapauan asin burukudan..minsn pa ngani kami ng laog sa klase n mga mamusingun ta ngapapahurus km jan sa balikid sa likod kaan n groto…ang mga bitis me nangunguritum kn alpog sabay paburukod palaog sa klasrum pag oras na kan klase,,,.. maugmang balikan mayad sa pamati salamat sa post mu n ine narumdom q ang mga maugmang nakaagi kn aq saru sa mga pasaway studyante hehehehehehe… sege me sana k ngangarak ngak jaN napaksi ang ngimot ko kaka ngirit hahahaha

        #ASKALPHREDITE

        Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s